(Bill Haast) एखाद्या व्यक्तीला तब्बल 172 वेळा साप चावला असं जर तुम्हाला कोणी सांगितलं तर नक्कीच तुमचा त्यावर विश्वास बसणार नाही. कारण विषारी सापाने फक्त एकदा जरी चावा घेतला तरी त्या व्यक्तीला आपले प्राण गमवावे लागते. असं असलं तरी जगात काही गोष्टींना अपवाद असतो. अमेरिकेत एका व्यक्तीला त्याच्या संपूर्ण आयुष्यात तब्बल 172 वेळा सापाने चापा घेतला. 20 वेळा तर त्यांची प्रकृती इतकी गंभीर झाली की, ते मृत्यूच्या दाढेतून वापस आले आहेत. या व्यक्तीने 2011 मध्ये आपल्या आयुष्याचे 100 वर्षे पूर्ण केल्यानंतर अखेरचा श्वास घेतला.
बिल हॅस्ट असं त्या व्यक्तीचं नाव होतं. बिल यांना लहानपणापासूनच सापांबद्दल विशेष आकर्षण होतं. सुरवातीला त्यांनी सापाचे खेळ दाखवण्याचे काम केले नंतर त्यांनी सापाचे एक संग्रहालयच उघडले.
खरचं 172 वेळा साप चावला का?
बिल हास्ट यांच्या अधिकृत वेबसाईटवर दिलेल्या माहितीच्या मते त्यांना 172 वेळा साप चावल्याचा आकडा हा अंदाजे आहे. यामध्ये लहान सापांनी घेतलेले चावे, त्यांच्यामुळे झालेल्या जखमा आणि घेतलेले इंजक्शन यांचा समावेश नाही. म्हणजेच वास्तविक आकडा हा यापेक्षा जास्त असू शकतो.
बिल यांच्याकडे अत्यंत धोकादायक प्रजातीचे साप होते. त्यांनी फ्लोरिडाच्या मियामीमध्ये सर्पेस्टेरीयम नावाचे संग्रहालय बांधले. त्यामध्ये जगातल्या अत्यंत धोकादायक प्रजातींच्या सापांचा समावेश होता. या संग्रहालयाला भेट देणाऱ्या लोकांसाठी बिल सापांचा खेळ आयोजित करत असे.
साप चावल्यानंतर औषध बनवण्यासाठी लागणाऱ्या कच्च्या विषाची निर्मिती करणे हा त्यांचा मुख्य व्यवसाय होता. 1990 च्या दशकापर्यंत ते दरवर्षी औषधी प्रयोगशाळांना विषाचे 36,000 नमुने पुरवत होते.
एकेकाळी, बिल हास्ट यांच्याकडे जगभरातील 10,000 हून अधिक साप होते, ज्यात सागरी, आफ्रिकन, कॉटनमाउथ, रॅटलस्नेक, कोब्रा, क्रेट्स, ग्रिन मांबा, आणि वाइपर अशा अनेक विषारी प्रजातींचा समावेश होता.
जगातल्या सर्वात विषारी सापाने देखील घेतला होता चावा
बिल हास्ट यांना डॉक्टरांंनी सापांपासून लांब राहाण्याचा सल्ला दिला होता. असं न केल्यास त्यांच्यावर मृत्यू ओढावू शकतो असंही ते म्हणाले होते. 1954 मध्ये बिल यांना क्रेट नावाच्या जगातल्या सगळ्यात विषारी सापाने चावा घेतला होता. या सापाच्या चाव्यानंतर जिवंत राहणे केवळ अशक्य आहे, मात्र अगदी विरूद्ध घडले दहा दिवसानंतर तो सापच मेला.
या कारणामुळे चावायचे साप
173 वेळा साप चावण्यामागचे कारण म्हणजे बिल हे त्यांच्या उघड्या हातांनी सापांचे जबडे उघडत असत. त्यांचे तीक्ष्ण दात रबराच्या पडद्यामध्ये घुसायचे, त्यामुळे विषाचे थेंब काचेच्या कुपीत पडायचे. ही प्रक्रिया हजारो वेळा करावी लागे जेणेकरून विषरोधक बनवण्यासाठी पुरेसे विष तयार होईल. या सर्व प्रक्रियेत साप त्यांना चावा घेत असे. ते स्वतः कोब्रा सापाच्या विषाचे इंजक्शन घेत होते कालांतराने त्यांनी विषाची मात्रा वाढवली त्यामुळे बहूतेकवेळा साप चावल्याचा त्यांच्यावर काहीच परिणाम होत नसे.
